Maður er nú ekki búinn að gera neitt annað en að læra fyrir Reikningshaldsprófið sem verður á laugardaginn. Get frætt þá sem vilja um prófjöfnuð, sjóðsstreymi, bankaafstemnigu, fifo, lifo, meðaltalsaðferð og ég veit ekki hvað og hvað en er að hugsa um að sleppa því að svo stöddu. En já fyrsta prófið mitt í háskóla fer fram á laugardegi. Ekki alveg nógu sáttur með það, en maður fær víst engu ráðið um þetta. Var að fá sendan póst áðan sem að innihélt upplýsingar í hvaða byggingu ég tek prófið, í hvaða stofu ég tek prófið og það sem fannst best, við hvaða borð ég á að sitja. Aldrei var það nú þannig í F.S.H að gimbillinn myndi vísa manni til sætis. En það hlýtur að vera einhver góð ástæða fyrir þessu.      

    Nú eru bara sirka 2 vikur þangað til að maður kemst í jólafrí. Mamma er alltaf svo góð við mig að hringja reglulega til að láta mig vita hvaða smákökur hún er að baka hverju sinni. Það hjálpar alveg helling í próflestrinum. Maður sitjandi og reikna og svo er maður bara látinn vita af því að ef að maður væri heima á Húsavík, gæti maður fengið sér laufabrauð, brúna niðurskorna (herðubreið held ég að það heiti), mömmukökur og púðursykurkökur. Ekki beint til að maður haldi huganum við bækurna

Að öðrum hlutum. Ég er að verða búinn að kaupa allar jólagjafirnar. Á bara eftir að kaupa eitthvað handa gamla settinu, Eyrúnu, Siggu Lóu og Árnýju. Spurning hvort að maður fari ekki að versla eftir próf á morgunn. Er að hugsa um að kaupa eitthvað af jólaskrauti í leiðinni. Gengur ekkert að hafa þetta einu óskreyttu íbúðina í blokkinni um jólin þó það verði enginn hérna. Lágmark að hafa alla vega aðventuljós í glugganum

    Biggi fór til Kosta Ríka í dag og af því tilefni ætlaði Friðgeir að bjóða mér, Gísla, Finni og Bigga í mat heim til Bigga og Finns á Þriðjudaginn til að kveðja Bigga. Eitthvað klikkaði það samt, þannig að sú ákvörðun var tekin að fara á Ruby Tuesday’s í staðinn. Þar var ákveðið að fá sér stóra hamborgarann sem að er alltaf í sjónvarpsauglýsingunum. Þetta var stærsti hamborgari sem að ég hef borðað yfir ævina, hann var svo stór að maður náði varla að klára hann. En hann var góður og það er víst það sem skiptir máli.

    Sólrún systir kom svo í heimsókn síðustu helgi. Hún var víst að fara á Rockstar tónleikana. Hún hafði það á orði að það væri skrýtið að koma í heimsókn bara til mín, ekki svona að vera að fara til mömmu og pabba og sjá mig svona í leiðinni. Þá fór maður að spá í því hvað þetta væri í raun skrýtið að búa bara ekkert “heima” lengur og vera bara að fá mömmu og pabba og aðra ættingja í heimsókn. Verður líka skrýtið um jólin að vera bara gestur “heima”. Þurfa að gista á dýnu á gólfinu inni í stofu eða eitthvað. Verður samt gaman að komast heim og sjá allar breytingarnar sem gerðar hafa verið á neðri hæðinni. Sjá t.d. sjónvarpið sem að pabbi keypti þegar hann var fyrir sunnan síðast. Fór með honum í Elko þar sem að pabbi sá 15” lcd sjónvarp. Pabbi fór eitthvað að spyrja afgreiðslu manninn um þetta sjónvarp. Fékk þá spurningu um hvort hann ætlaði að hafa þetta inni í eldhúsi. Pabbi svaraði bara alveg kaldur að þetta ætti að vera inn á baði. Hélt að afgreiðlusmaðurinn yrði ekki eldri. En það er víst svona þegar maður flytur að heiman. Þá er farið að gera húsið enn flottari bara til að maður vilji flytja heim aftur. Settið einmitt nýbúið að splæsa í 2 manna nuddbaðkar og þetta sjónvarp á víst að vera á veggnum fyrir ofan það svo maður geti horft á sjónvarpið í baði. Eitthvað sem að segir mér að það verði nýtt sér það á aðfangadag.

Er samt að hugsa um að reikna eins og 2 gömul próf í reikningshaldi í viðbót svo að maður verði 110% klár á þessu áður en að maður fer í prófið á morgun. Ekki búast við öðru bloggi hérna fyrr en eftir próftörnina. Síðasta prófið mitt er 21. des eins og fram hefur komið áður. Pirrandi því að það eru flestir vinir mínir að detta í frí á allra næstu dögum.

Það er snjór í Reykjavík. Miðað við umfjöllunina í fjölmiðlum þá mætti ætla að það væru 3 metra háir skaflar hérna. Þetta er nú samt ekki mikið meiri snjór en er á Húsavík á hverjum vetri. Ekki sér maður það í fréttunum eða les í blöðum þótt það sé smá snjór þar.

 Nú fer allt að verða vitlaust í þessum blessaða skóla. Styttist í loka próf og þá þarf maður að fara að lesa og lesa og lesa og lesa. Er einmitt þessa dagana að leysa verkefni í Reikningshaldi þar sem að ég þarf að gera prófjöfnuð og ársreiknig, já það er jafn leiðinlegt og það hljómar. Síðan er maður búinn að skrá sig á eitthvað deltabúðir sem eru sem sagt stærðfræði búðir sem að maður mun vera í í 12 tíma fyrir stæ prófið. Þriggja daga námskeið sem að maður verður að læra um diffrun og hvað þetta nú allt heitir. Vonum að það nægji til að ég nái þessu blessaða prófi. Hef víst aldrei verið neitt hrikalega góður í stærðfræði. Svo munu næstu dagar bara fara í það að vera í bókhlöðunni og lesa yfir sig.

 Get samt ekki beðið eftir að þessu sé lokið og maður getur farið að fara til Húsavíkur. 31. dagur. Eins gott að þetta verði fljótt að líða. Á pantað fæug norður um 18:30 þann 21. des. Verður yndislegt að komast norður, hitta familíuna og svona. Hefur nokkrum sinnum komið fyrir að maður hugsi “á maður ekki bara að hætta þessu og fara norður” en maður verður víst að hugsa um framtíðina og hvað maður græðir á því að mennta sig. Get samt viðurkennt það að það mun verða skrýtið að eyða heilu sumri hérna í Reykjavík eins og planið er að gera.

 Skrapp í bíó í gær og fór í fjórða skiptið á stuttum tíma á frumsýningarhelgi myndar. Fyrst var það Mýrin, svo Borat, svo Flyboys og í gær var það Casino Royal, nýjasta myndin um James Bond. Það er frekar góð mynd, mjög ólík síðustu Bond myndum en er samt mjög góð. Við Biggi vorum reyndar bjartsýnir og fórum í Smárabíó klukkan 19:45 og ætluðum á myndina klukkan 20 en þá var löngu uppselt. Hringdum í Finn sem sagði okkur að myndin yrði sýnd í Mjóddinni klukkan 21. Fórum þangað og fengum þá að vita að hún yrði ekki sýnd þar fyrr en 22:30, ákváðum að skella okkur bara þá, þannig að komumst á myndina.

 Held að það sé ekkert meira að frétta af mér. Læt þetta nægja í bili. Næsta blogg verður örugglega á Sunnudaginn og verður það hugsanlega síðasta blogg þangað til að prófin eru afstaðinn.

Nú er sá tími þegar að fólk fer að spyrja mann hvað manni langi í í jólagjöf. Af því tilefni ætla ég að setja hér inn óskalista.

Fyrsta mál á dagskrá er það að ég vil alls EKKI fá geisladiska í jólagjöf. Hlusta mjög sjaldan á þá, keypti einn fyrir 2 árum og er hann enn í plastinu. Þannig að það er alveg off limit.

Það yrði líka fínt ef að ég fengi ekki DVD myndir. Hef ekkert rosalega mikinn tíma til að horfa á DVD.

Ég vil helst að fólk verði frumlegt svo að maður upplifi kannski einu sinni jól þar sem að maður veit ekki hvað er í 99% af pökkunum sem að maður fær.

Efst á óskalistanum í ár er inneign á utanlandsferð. Alltaf gott að byrja á einhverju sem enginn getur gefið manni.

Númer 2. Mig vantar föt og skó, mætti einhver góðhjartaður splæsa í þannig. Ekki verra ef að nýji Man Utd búningurinn myndi læðast með, en mér þykir það harla ólíklegt.

Númer 3. Góða bók. Eitthvað sem að mig hefur vantað eftir að ég flutti suður. Ekkert betra en að lesa smáveigis áður en að maður fer að sofa. Eina sem að ég hef hér eru skólabækur og ekki nennir maður að lesa þær fyrir svefninn. Er ekki með neina sérstaka í huga, þar sem að ég veit ekki alveg hvaða bækur eru að koma út um jólin. Helst einhverja spennusögu bara. Ekki ævisögur takk.

 Númer 4. Nýja Trival Pursuit. Alltaf gaman að spila Trivial. Einnig yrði fótboltaspilið stjórinn vel þegið.

Númer 5. Það eru alltaf not fyrir rakspýra, sjampó og álíka snyrtidót. Myndi ekki blóta því að fá eitthvað svoleiðis.

Þetta er svona það sem að mig dettur helst í hug. En þetta er ekki endanlegur listi og það má alveg kaupa eitthvað sem ekki er á þessum lista.

Segi þetta gott í bili. Splæsi í blogg í vikunni.

Spurning hvort að maður þurfi ekki að fara að hætta að lesa bloggsíður. Lenti á bloggrúnti og álpaðist þar inn á síður hjá Húsvíkingum sem að ég þekki lítið sem ekki neitt. Það hafði þau áhrif að mig langar miklu mun meira að fara til Húsavíkur. En maður verður bara að bíða rólegur og sætta sig við það sem maður hefur. 

Dugnaður í mér. Vaknaði klukkan 7 í morgun, og var stefnan sett á ræktina klukkan 8 og svo bara lestur í Bókhlöðunni. Nú er klukkan að detta í 10 og ég er enn og þreyttur til að standa upp úr sófanum og hvað þá að fara úr húsi. Þarf reyndar að fara að drífa mig í ræktina ef ég ætla að komast þangað í dag. Kenni reyndar einveru helgarinnar um þessa leti. Gísli skrapp í Borgarnes um helgina, Arna Rún fór til Húsavíkur, Finnur til Akureyrar og Friðgeir sagðist geta hitt mig eftir klukkan 2 á Laugardagsnóttina. Þannig að hekgin fór ekki í neitt nema að horfa á fótbolta. Fengum einmitt Skjáinn hingað um helgina sem gerir allan lærdóm mun erfiðari, en maður verður bara standast freistingarnar og taka sig á.

Fór í Reikningshaldspróf á Laugardaginn (ekki láta nafnið rugla ykkur, þetta er bara pure bókfærsla). Gekk ekki alveg sem skildi, en maður veit allavega núna hverju maður má búast við í lokaprófinu. Nú þarf maður bara að vera duglegur að lesa fyrir rekstrarhagfræðiprófið sem er næsta Laugardag. Þarf að lesa eina 12 kafla fyrir prófið og þyrfti helst að reikna nokkur dæmi líka. Það er ekkert farið að minnast á miðannapróf í Stærðfræði, þannig að maður er farinn að sjá fram á það að geta hugsanlega skroppið norður fyrstu helgina í Nóvember (nú verður prófið pottþétt sett á þá).

Fór í bíó í gær. Var ákveðið að fara á Mýrina í Háskólabíói. Við, Gísli og Biggi vorum greinilega ekki þeir einu sem fengu þessa hugmynd því að það var gjörsamlega stappað þarna. Hef aldrei séð jafn langa röð til að komast í bíó. Hafði nú ekki miklar væntingar þar sem að mér þótti bókin ekkert sérstaklega spennadi. En þetta var fínasta afþreying þó að maður hafi ekkert verið að missa sig vitandi hvernig allt heila klabbið myndi enda. En þetta er samt alveg mynd sem ég get mælt með. Reyndar dæmigerð íslensk mynd sem er gerð eftir bók. Koma fullt af innskotum sem gera ekkert fyrir söguna og fólk skilur ekki nema hafa lesið bókina. Mikið um þetta í Englum Alheimsins.

En ætla að fara að koma mér í ræktina og kíkja síðan eitthvað í bækur áður en ég fer í skólann. Bið að heilsa. Sé ykkur Húsvíkingana vonandi fljótlega.

Hérna er svo smá mynband í lokin.

Kominn tími á nýtt blogg. Var að lesa bloggið hjá Finni og kom þá líka þessi mikla löngun að fara til Húsavíkur. Ætlaði að fara síðustu helgi, en þá var dembt á manni þjóðhagfræðiprófi. Ætlaði þá þessa helgi en þá er sett á mann reikningshaldpróf og svo er rekstrarhagfræði próf þann 28. Sé fram á það að komast ekkert norðu fyrr en í jólafríinu, sem er 21. des. Fékk reyndar þá flugu í höfuðið áðan að beila á skólanum, flyrja heim til Húasvíkur, fá mér vinnu í úrval og geta þá dottið í það um hverja helgi, því það er eitthvað sem maður kann. Var reyndar fljótur að hætta við það.

 Er nú búinn að læra ýmislegt tengt viðskiptafræði hér í háskólanum en ég er samt stoltastur af því að hafa náð þeim merka áfanga að geta opnað reykvískar mjólkurfernur. Hvað er málið með þær?

 Búinn að sjá einn stóran mun á því að fara í ræktina í vesturbænum og á Húsavík. Þegar maður var á Húsavík, þá var það Dóra Ármanns. sem var í ræktinni á sama tíma og ég, en hérna eru það Bubbi Morthens og Þormóður Egilsson. Ekki eins og það skipti máli, en annars er þetta mjög svipað.

 Var að fá próftöfluna mína. Fyrsta prófið mitt er 9. des. Svo fer ég í próf 12. des., 15. des, 18. des.  og síðasta prófið er svo 21 des. sem þýðir að maður kemst heim til Húsavíkur annaðhvort um kvöldið 21. des eða bara þann 22. Verður samt alveg dæmigert ef að það verður ófært norður á þessum tíma og maður þyrfti að eyða jólunum einn í Reykjavík. En við vonum bara það besta.

 Fór í meðmælagöngu um daginn. Var nú ekki alveg eins og ég bjóst við. Mættu nú ekkert svakalega margir í þetta, en samt nógu margir. Var rölt frá háskólanum og niður að Alþingishúsinu. Þar voru haldnar nokkrar ræður sem að maður heyrði mismikið í. Svo setti maður stein í menntavörðuna sem að fól í sér skilaboð til alþingismanna að taka menntamál fyrir við næstu kosningar. Svo voru hrópuð nokkur slagorð eins og “mennt er máttur”, “við eigum engan pening” og “menntamál eru kosningamál”. Einn sem var þarna hafði það á orði, að þætti væri eins og að vera í mótmælagöngu. Hann vissi bara ekki alveg hverju hann væri að mótmæla. 

 Látum þetta gott heita í bili. Vona að maður hafi frá einhverju merkilegu að segja næst þegar maður skrifar.

 

P.s. Gummi markmaður er í FM2007.

Jæja nú getur maður farið að blogga aftur. Ástæða bloggleysis er sú að þriðjudaginn 26. september fluttum við Gísli Árni, inn í íbúð að Reynimel 92. Þar hefur ekkert net verið fyrr en í dag. Ætlaði reyndar að blogga í skólanum einhvern tíman, en þegar maður var búinn að blogga í 20 mín um helgina sem að maður var á Húsavík, afrekaði ég það að stroka allt dótið út. Maður reynir allavega að vera duglegri að blogga,

 

Það er helst að frétta úr borginni, fyrir utan húsnæðismál, að kallarnir eru farnir að stunda ræktina á fullu. Byrjuðum á fimmtudaginn. Splæst var í 8 mánaða skólakort. Búið að taka vel á því og stefnt á að komast í eitthvað smá form fyrir næsta sumar. Gísli vill samt að markmiðið verði að geta hlaupið 10 km í marþoni Glitnis næsta sumar. Veit ekki með það, maður byrjar bara á því að koma sér í form og sér svo til hvort maður geti staðið í einhverju maraþonhlaupi.

 

Skólamál eru öll að komast á rétt ról. Er að verða búinn að lesa þá kafla sem námsáætlun reiknar með að maður sé búinn að lesa. Spurning hvort að það verði ekki bara tekið vel á því í Bókhlöðunni eftir ræktina á morgun (á maður kannski að segja á eftir?) Er að tala um Laugardag.

 

Mamma og pabbi koma svo suður á morgun með restina af búslóðinni minni. Þá fer heimilið að verða komið í fullkomið ástand. Vantar þá helst myndir á veggi og skóhillu. Hefur verið alveg ótrúlega auðvelt að redda öllu íbúðina og ef að fjölskylda annarhvors okkar hefur ekki getað reddað einhverju getur fjölskylda hins það. Allt að verða mjög heimilslegt hérna, fólk þarf endilega að kíkja í heimsókn ef að það er statt í borg.

 

En nú er að verða kominn mánuður síðan ég kom til Húsavíkur og er stefnan sett á að fara þangað á mánaðarfresti. Ef að áætlun stenst verður farið á fimmtudaginn. Fer eftir hvort Arna Rún verði upptekin í námi eður ei. Þá er stefnan sett á að kíkja í nokkra kalda og tékka hvort að það sé jafn mikið af svíium á Bauknum og voru þar síðast.

 

Er að hugsa um að hafa þetta ekkert lengra. Þar sem að það eru rétt 7 tímar í áætlaðan upprisutíma.  

Góðan Daginn!

Nú er klukkan 9 og sit ég fyrir utan Háskóla Íslands og læt mér leiðast. Má til gamans geta að ég fer ekki í tíma fyrr en 13:20. Vaknaði klukkan 06:30 til að fá far í bæinn.

Maður er óðar að ná tökum á því að hvernig háskólalífið virkar. Hef samt verið of latur að koma mér í lærdóm. Aðallega vegna þess að maður er ekki búinn að finna neina góða aðstöðu til lærdómsiðkunar. Vonandi rætist úr því með bættum húsnæðismálum, sem að ég vona að verði búið að leysa úr fljótlega upp úr helgi.

Að öðrum málum. Fór til Keflavíkur í gær og sá þar Hemma og Hadda í harðribaráttu í leik Kelfavíkur og Fylkis. Leikurinn var frekar leiðinlegur reyndar þar sem hann var spilaður í mestu rigningu sem að ég hef nokkurn tímann upplifað. Leikurinn endaði samt 1-1 og er þetta fyrsti Keflavíkur leikurinn sem að ég fer á og sé þá ekki vinna.

Er að leka niður úr þreytu hérna, þannig að ég ætla að segja þetta gott í bili.

Vegna fjölda áskoranna hefur kallinn ákveðið að skrifa eitt blogg af dýrari gerðinni. Það er allt að gerast.

Mál málanna er það að ég er hættur að vinna í Úrval. Jú þið lásuð rétt kallinn er hættur í Úrval eftir að hafa unnið þar í eitt og hálft ár og náð þeim árangri að vinna í tæplega 300 klukkustundir á einum mánuði. Þess vegna ætla ég ekkert að vera að greina frá því hvað ég gerði í sumar. Fólk ætti að átta sig á því sjálft.

Eitthvað ætlaði ég að skrifa meira. Jú alveg rétt. Skólinn er að fara að byrja og þá breytist maður víst í montið háskóla nörd. Eitt af því sem að fylgir skólanum er að maður þarf að flytja í borg bleytunar og dauðans Reykjavík. Byrja nú reyndar í Borgarnesi þar sem að Reykvíkingar eru gífurlega tregir að láta myndarlegt landsbyggðar fólk leigja íbúðir af sér. Fá víst svo mikla minnimáttar kennd eða eitthvað álíka. Nú er maður ekki búinn að gera neitt annað í dag en að pakka, og þar sem að ég er búinn að pakka öllu niður, nema fartölvunni að sjálfsögðu, þá bíst ég við því að fara mjög fljótlega suður og reikna passlega með því að fara á morgun. Vona svo bara að fá íbúð sem fyrst, af tveim ástæðum:
   
     1) Það fara tveir tímar á dag að keyra frá Borgarnesi til Reykjavíkur og aftur í Borgarnes.

    2) það sem við Gísli erum fátækir námsmenn myndum við spara penge með að fara á einum bíl en það er einn galli við það. Hann er yfirleitt í skóla frá 8-12 á meðan ég er frá 12:30 til 17. Þannig að ég þarf að vakna á milli 6-7 á morgnanna til að fá far í borgina og þarf svo að dunda mér þar til hádegis og svo þarf Gísli að finna sér eitthvað að gera frá hádegi til klukkan að verða 18 á meðan að ég er í skólanum svo að maður fái nú far til baka.

Held að það séu einhverjir enn að bíða eftir Spánarmyndunum. Lofa að setja þær inn fljótlega og einnig reynir maður nú að blogga nokkuð reglulega. Ætla að segja þetta gott í bili.

Lofaði víst að setja inn myndir í dag. En vegna tæknilegra örðuleika get ég ekki sett þær inn fyrr en ég kem heim frá Spáni. Minni bara á bloggið fyrir neðan!

Nú styttist í að maður fari af landi brott og haldi á vit ævintýrana í spánverja landi. Nú er mér farið að hlakka til að fara út. Tvær ástæður fyrir því:

1) Það er farið að snjóa úti og ekkert hægt að gera á meðan

2) Einhverjir jarðfræði nemar úr HÍ eru búnir að hertaka heimili mitt.

Nú halda einhverjir að ég sé að ljúga þessu, en svo er því miður ekki. Á tveggja ára fresti koma jarðfræðinemar til Húsavíkur og gera einhverjar rannsóknir úti á Tjörnesi. Síðustu tvö skipti hafa þeir gist í orlofsíbúðinni sem við vorum með. Svo hringdu þeir fyrir ekki svo löngu síðan og sögðust ekki þurfa stað til að sofa heldur bara einhvern stað til að borða á. Mamma hélt að það væri nú lítið vandamál að leyfa þeim að borða hérna. Nú er búið að fylla húsið af mat, sem maður má ekki borða, og svo kemur fólkið um 8leytið á morgnana og svo aftur um kvöldmatarleytið og eldar sér eitthvað að borða. Glórulaust alveg hreint.

Afrekaði það svo að útskrifast á Laugardaginn. Byrjaði á klukkuríma athöfn í kirkjunni sem að ég hélt að yrði endalaus þökk sé ræðuhöldum Guðmunds Birkirs og Gunna Bald., en þetta hafðist að lokum. Eftir ræðuhöldin tók við veisla í Kirkjubæ sem heppnaðist bara vel og þar mættu um 40 manns og fékk maður fullt af góðum og nytsamlegum gjöfum. En um kvöldið var aðalmálið, Eurovision. Horft var á það heima hjá Ásgeiri Þór með Bigga og Finni. Horfðum við á herleg heitin á Sky og þulurinn þar var hreint stórkostlegur og hef ég sjaldan hlegið jafn mikið yfir Eurovsison. Eftir Eurovision var svo haldið á Baukinn á ball með hljómsveitinni Ínu. Þar voru flestir útskriftarnemar samankomnir og var mikið fjör þar. Myndavélin var að sjálfsögðu tekin með og munu myndir kvöldsins skila sér inn á morgun. Segjum þetta gott í bili og sjáumst á Spáni.